Eyé ké diss, Chateau?

No riviére

In vûdant du bos des vallées
Dè r’chenn’ à peine à in fossè
In p’tit èffant d’in adjamblée
Saut’roût d’seur mi sans tcher d’sus s’nez.

D’ai vu l’joû d’sous in estoquée
Vâdant d’in p’tit trau bouyonant
Tout press’ à print’ em’m n’involée
Au trèvi du bos èt des tchamps

Sans m’rastèni de fait m’passâtche
In caricolant d’sus m’tchèmin
l’ faut pou qu’d’arrive dins l’villâtche
Que n’euss’ pus l’air d’in p’tit serpin.

C’est s’t’intrè les tienn’s què d’voyâtche
C’est toudi du costé qui desquind
Tout in murmurant d’sus m’passätche
Pa’ l’plève, pau soleil ou pau vint.

Tout l’long dè m’tchèmin i’ m’arrive
Què d’autr’ pètits richos comm’ mi
Vienn’tè à m’rincontre d’sus mes rives
Pasqu’i faut bin allardgi m’lit.

Dè grandi au cours dè m’voyâtche
Qui faut quétfois passer d’seur mi
On fait des ponts pou fait l’ passâtche
l’ faut bin ça pou passer m’lit.

In m’faufilant dévins l’villâtche
Dins les djardins dins les pachis
Dé passe quétfois padsous l’ombrâtche
Intrè deus ringées dé pouplis.

Dins l’temps in passant à Carnières
Dè f’sous tourner l’moulin à scorse
Et dè s’n’étang d’in astoûs fiert
On mè r’tènoût pou print’ em’n force.

De s’temps là dè rindous djà service
Car dè f’soûs d’jà d’aller l’pilon
Dè l’platin’rie mais qué suplice
Avant de l’tchaussée passer l’pont.

De passe pa’ tout’t sorte dé villâtche
D’arrose des pachis et des tchamps
In y ramassant d’sus m’passâtche
C’qui n’est nin toudi ragoustant.

Desqu’a Mons y’a saquant arsouiyies
Qui font el trajet avu mi
Arrivé là c’est s’t’avû l’ Trouyie
Qui faut qué dje partâtche emm lit.

A parti d’là djè m’gonfelle
Et dje fait quétfois parler d’mi
Quand in gros orâtche s’amoncelle
Adon les rivrains ont peu d’mi.

Malgrès tout no’s f’sons bon min’nâtche
On s’intind à deux c’qui à d’bia
No’s f’sons du bia du bel ouvrâtche
In laichant passer les batias.

No’s traversons el Borinâtche
Desqu’a ell frontiére du Hainaut
Admirant terris et tcherbonâtches
Pou d’aller rincontrer l’Escaut.

Dè n’ai jamais fait dè l’sauvâtche
Si dè n’va nin m’tchèmin tout droût
I n’a vraimint qu’pa’ in orâtche
Qué m’lit d’véroût n’miett’ trop s’troût.

On a pourtant mus’lè mes forces
In m’canalisant c’it m’destin
Mais quand in gros orâtche s’amorce
Dè n’sais m’rastèni c’est certain.

Malheureus’mint dè porte la Haine
Dins les corons, dins les maisons
Et pa m’conduite dè fait dè l’peine
Aux dgins qu’ont peu d’s’innondations.


Camille BUSQUIN.