Eyé ké diss, Chateau?

Qué nouvèle, astèz prèsse ? Alèz, taboûrd, in route !!! Sautlons dsu l’tram : in pas- sant au numèrô yun à Djolimont, nos virons ddjà padzeûr, lauvau bi lon dins l’lumiére èl têre bènîye qui nos ratind..

Pou spargni nos mastokes, arètons l’vwayâdje à l’èstâcion d’Marlanwè. Dèvant d’deskinde pau pont du Condût pou rmonter l’voye pa dins l’bos, raguidons avû tous nos-îs les bosses èyè les fosses qui tourne-t’à nos pîds. C’est m’vilâdje ! Qu’in dites? I n’a pont d’panorama parêye par ci !

Ouf ! Avèz dajà mau vos djambes? Nos vlà à l’frontiére. Waye, ène bèle frontiére qui keûrt tout droût au long d’l’uréye dou bos. C’est l’Tchausséye Brunau, ène tchausséye romène viêye dè 2.000 ans minme què mossieû Goerges èyè pus târd ès fré Raoul — qui sont dvant Dieù — a fét avaler des traus au boûrd pou dèstèrer des mésons t-intiéres. C’est ‘lardje voye là qui nos sépare dè Marlanwè, dèspûs Twâs-Arbes à l’Gratène dus- qu’au Placârd.

Téjèz-vous, ravalèz vo n-alène : nos pèrdons pid su l’pèyis, sintèz come èm cœûr bat! Nos-astons tout-à l’coupète des Tris, à Djan dou râle, Tout-Vint èyè I’Tchèmin Royâle nos-atire-te mais perdons par ci. Vlà ‘Tchènoû, c’est doci qu’on s’a batu in 1170. C’est doûci qu’d’amin.noûs mes vatches à pachî invi 1895. Introns au Cwin du bos pau Cras Tiène. Grimpions les Castèlés, swivons l’Brîsè in léchant Sèpt Pachis, el Rin.ne des Bèlges èyè l’Bièrgard su la gauche, infonçons-nous dins l’Trau d’Héremont pau Trichon. Vèyèz in passant èl cinse del Toûr, el brasserîye del Tourète, des vrés chataus fôrts. El Tchèmin dou Ravèt èn vos tinte wére, swivons l’talus au dzeûr du Fond des Maçons, agrapions-nous au tiène du Gréto; à gauche, les-Escayès, à dwate in tchmin d’traverse dins n’ méson, i n’chért qu’à radoûci l’rampe, c’est I’vi tchmin Mayète. Tournons pa l’asserèle pou plondji su l’Batrau. Nos poûrine ertchére à Warèssé pa les Martiniéres ou bi pau tiène dou Comissére in passant dlé l’Fontène dou Bètchu in face dè l’ruwele Tèrése qui brét mais swivons pus râde el râye Nounète qui nos min.nera al Place Vèrte. Nos-astons in plein Fond des Tris. Nos povons rmonter l’Bos d’Lin djusqu’à Notrè-Dame dè Saint-Sang ou bi nos-ingadji dins les rouwèles Mamzèle Catrine pou tourner l’Tine à Cayaus èyè rèni pau Champs-Eliséyes a l’Platèneriye èt l’Aliyance.

C’est ci qu’on patinoût quand il-avoût co ds-iviérs. Al place dè sive les rayes dusqu’au Calvére, atrapons l’pièssinte pou daler londji les Vintiéres padzous les-Aunias; ça m’rapèlra l’tamps qu’nos fine des couyons au dzeûr del riviére avant d’nadji à ou tout nu avi in mouchwar de poche come tweye dẻ vigne. Eûreûs tamps !!!

Vlà l’pavè d’Saint-Elwa, el dèrni qu’on monte su s’dos quand on vos min.ne à vwa-ture al Têre Capron, no cèmintiére. Mais n’dalons ni par là ; gridions al valeye du talus pa l’Fontène de l’Osté. Bachèz vos tisse, wétèz à vos pids, risquons-nous dzous l’petit pont d’in mète dè wauteûr qui va nos rômi al lumiére in face dou Couvant couneû lon z-èt lardje dins les cinses d’alintoûr qui y mète-tè leûs ptitès fiyes à l’ombe pindant deûs twâs- ans avant de rlèver leû trèsse. El vi tchmin d’fiér qui n’chért pus què d’ promnâde à l’Ospice no fra vir çu qu’on n’wwat nule pârt : èl Pont dèl Cure, in pont sans voûte qu’on-a abatu pou fé plési au curè.

Passons l’Roudjusse èt l’Pètit Saint-llére, travèrsons l’tiène d’Oumont qui va à les 13 Bouns èyè pa l’Gâde, tournons su Colârmont. Au mwins, par ci, on-èsst-au vêrt : c’est l’pus bia cwin d’no vilâdje, c’est l’pus glories, c’est l’pus trisse ètou. Dèspûs 14, ça vos-impougne de bèrlôrer par là. On diroût qu’l’âme des vayants ptits français est dmoréye agrapiéye dins les buchons èt qu’èle djumit dins les richots qui clapote-tè dzous les sto- kéyes.

Ervènons pa Filomène Djâque pierduye dins les voyes du Bos des Valéyes, in vi bos à ptitès voyes tourmintées, sauvâdjes à plési. Gagnons l’Pèrou pou rvèni pa l’ètang dou Moulin à scorces; dè d’là, d’vos ramin.n’rai su l’place del Chambe comune pa l’rouwèle dou Mèdcin.

Astèz scrand, asârd ? Tabord, dè vos frai ni vir el Cwin dou Diâle ni l’Tchaud Coron, ni l’Fwan qui poûsse ; dè vos sparègnerai l’Champs d’là Haut, èl tiène Fofôre, èl ci Catèyine èyè l’ci Canicot mais d’vos moustérai dé d’lon èl tiène dou Bos des Faus, èl pére dé nos cint tiènes d’yu g’ qué les Français ont bombardè Marimont in 1794.

Il-est tamps d’raler. Buvons in coûp. Yun d’ces djoûs, vènèz à scrène à no méson : tout-in pèrdant n’tchaude au culot dou feù, nos fumerons dou bon vi toubak des Trîs, dou ci dè m’grand-pé èt d’vos conterai tout ç’cu nos-avons d’ouries au pèyis et què d’n’ai ni yeû l’tamps d’vos spliqui audjèrdu.

In ratindant, convenèz-in èt dites avu mi : « Ça, c’èsst-in vilâdje, èno ? »

RASCOURCI (Léopold GARCY). “El Mouchon d’Aunia », février 1923.